រឿងភាគខ្មែរ "ភ្លៀងធ្លាក់ក្នុងបេះដូង"

នៅកុមារភាព វីរៈ​ និងឌីណា​ជាមិត្តសម្លាញ់នឹងគ្នា ពួកគេតែចំណាយពេលពីការសិក្សានិងការងាផ្ទះ ទៅនៅឯចម្ការឈូកដែលជាកម្មសិទ្ធិរបស់គ្រួសារវីរៈ។ វាជាចម្ការរបររកស៊ីរបស់គ្រួសារវីរៈមែន តែវាជាជំរកដ៏កក់ក្តៅថ្មីមួយទៀតសម្រាប់ឌីណា ដើម្បីគេចចេញពីសុបិនអាក្រក់នៃអំពើហិង្សាក្នុងគ្រួសារ ដែលមានឪពុកជាមនុស្សមិនខ្វល់ពីប្រពន្ធកូន ផឹកស៊ី​ស្រវឹង។ វីរៈយល់ច្បាស់ពីទុក្ខសោករបស់ឌីណា តែងតែជួយយកអាសារនាង កំដរ និងជួយលើកទឹកចិត្ត ហើយក៏ជាអ្នកការពារ និងជាពន្លឺសង្ឃឹមរបស់ឌីណាផងដែរ។ នៅទីនោះ វីរៈបានសន្យាយ៉ាងម៉ឺងម៉ាត់ថា៖ "ប្រសិនបើមានរឿងអ្វីកើតឡើង ឌីណាអាចមកនៅទីនេះ គេនឹងស្វែងរក និងការពារនាងឱ្យខានតែបាន"  ប៉ុន្តែ ព្រហ្មលិខិតហាក់ដូចជាលេងសើចនឹងពួកគេ នៅយប់ដ៏គួរឱ្យខ្លាច ​បន្ទាប់ពីមានហេតុការណ៍ដ៏អាក្រក់កើតឡើងនៅផ្ទះរបស់នាង (ឪពុកម្តាយមានជម្លោះដល់បាត់បង់ជីវិត) ឌីណាបានរត់មកកាន់បឹងឈូកទាំងយប់ងងឹត ដើម្បីស្វែងរកអ្នកការពាររបស់ខ្លួន ប៉ុន្តែវីរៈមិនអាចទៅដល់ទីនោះទាន់ពេលឡើយ លុះព្រឹកព្រលឹមឡើង ឌីណាបានបាត់ខ្លួនយ៉ាងអាថ៌កំបាំង បន្សល់ទុកតែភាពស្ងប់ស្ងាត់នៃបឹងឈូក និងវិប្បដិសារីក្នុងចិត្តវីរៈ។ ច្រើនឆ្នាំកន្លងផុតទៅ...ដោយជាប់ជំពាក់នឹងពាក្យសន្យាដែលមិនបានសម្រេច ពីក្មេងប្រុសដ៏រស់រវើក វីរៈបានក្លាយជាបុរសម្នាក់ដែលស្រងូតស្រងាត់ រស់ក្នុងស្រមោលនៃអតីតកាល។ ទោះជាយ៉ាងណា គេបានចាប់ផ្តើមប្រើជីវិតថ្មីមួយដើម្បីតាមរកក្មេងស្រីដែលបានបាត់ខ្លួនពីស្រុកភូមិនិងចម្ការឈូកនោះ ទោះបីជាត្រូវចំណាយពេលប៉ុន្មានឆ្នាំក៏ដោយ។ តើពាក្យសន្យាដែលមិនបានសម្រេច កំពុងនាំគេទៅរកការពិត ឬនាំគេទៅរកការលះបង់ដ៏ធំធេងជាងនេះ?

• 2026
• Khmer
• --